Afurika

MIFOTRA iravuga ko kwigira ku murimo biba ari igisubizo ku isoko ryawo

Umuyobozi Mukuru w’Agateganyo ushinzwe umurimo muri MIFOTRA Mwambari Faustin (iburyo), Yosam Kiiza Umuyobozi Mukuru wa Imanzi Business Instutute (Hagati) na Marie Pierre Ngoma ushinzwe Porogaramu muri APEFE

Minisiteri y’Abakozi ba Leta n’Umurimo ( MIFOTRA)  iravuga ko urubyiruko rwigira amasomo mu ishuri 50%, iyindi 50% bakayigira ku murimo bituma bagira ubumenyi bwo mu ishuri ariko bakabuhuza n’ubumenyi bwo hanze uwo muntu aba afite ubumenyi bwuzuye, akaba igisubizo ku isoko ry’umurimo.

Mu nama yateguwe ku bufatanye bwa MIFOTRA n’Urugaga rw’Abikorera (PSF) ku nkunga y’Umuryango Mpuzamahanga w’Ababiligi ufatanya na Leta y’u Rwanda mu gushyira mu bikorwa gahunda ya Igira ku murimo (APEFE) hagamijwe guhuza urubyiruko rusoje ikiciro cya mbere k’imyuga mu byiciro bitandukanye rwatewe inkunga na APEFE n’abafite ibigo, Umuyobozi Mukuru w’Agateganyo  ushinzwe umurimo muri MIFOTRA Mwambari Faustin,  yavuze ko abarangije muri gahunda ya Igira ku murimo bafite imyitwarire itanga ikizere  ku isoko ry’umurimo.

Yagize ati: “Urubyiruko rurangije ikiciro cya mbere rwiga amasomo 50%, rukigira ku murimo 50% mu gihe cy’umwaka ntirushobora kubura akazi kandi naho rukoze rutanga umusaruro. Kubona akazi nta bwo byoroshye ariko bisaba ko abantu baba bafite ubushobozi bwo kujya ku kazi.”

Akomeza agira ati: “Igikorwa cyabereye hano cyo guhuza abana barangije kwiga bigira ku murimo ndetse n’abakoresha bari muri ibyo byiciro by’imirimo, abakoresha benshi babishimye ndetse bagaragaza ko biteguye guha urwo rubyiruko imirimo bagakorana.  Ngira ngo impamvu ni uko bariya bana bize mu buryo bubafasha kubona ubumenyi bukenewe ku isoko ry’umurimo aho bigaga 50% bafata amasomo mu kigo na 50% bagashyira mu ngiro ku buryo abakoresha bazi neza ubushobozi aba bana bafite, bazi ko bashobora kuba igisubizo ku musaruro wabo, bazi ko bafite ubushobozi.”

Impande zombi zibyungukiramo

Avuga ko ari uburyo bw’igisubizo ku rubyiruko ruba rwize runyuze muri ubu buryo kubera ko bibaha ikizere bikanaha ikizere abakoresha bashaka kubaha akazi kuko bo badatanga akazi kubera impuhwe ahubwo batanga akazi bitewe n’icyo bashaka mu mukozi.

Ati: “Ubwo buryo bw’imyigishirize abakoresha babushimye cyane ndetse natwe turabwishimira. Ni yo mpamvu twabahuje abashaka akazi n’abagatanga, abashaka akazi bakagaragaza ubushobozi bafite, abatanga akazi na bo bakagaragaza icyo babakeneyeho bityo, impande zombi zikabyungukiramo.

Gahunda yo kwigira ku murimo iratanga umusaruro

Mwambari avuga ko gahunda yo kongera imirimo igenda neza kuko ngo iyo urebye imirimo yahanzwe umwaka ushize igera ku bihumbi 208 iyo ugereranyije n’impuzandengo y’ibihumbi magana abiri na cumi na bine iteganyijwe kugeza mu bihumbi 2024 ngo ubona ko hari ikizere ko icyo gihe bazaba barahageze  kuko nkuko abishimangira ngo  imbaraga ziriho zaba izishyirwa mu ishoramari zaba izishyirwa mu bikorera zaba ndetse na gahunda za Leta cyane cyane izinyuze muri gahunda ya Kora Wigire, ngo basanga  ikibazo cyo guhanga umurimo kigenda kibonerwa umuti.

Byongeye kandi ngo iyo urebye umubare w’ubushomeri mu myaka itatu ishize ubona hari icyagiye kigabanuka kuko wari kuri 17% mu mwaka wa 2017 ubu ugeze kuri 14.5% kubera ingufu Leta y’u Rwanda ishyiramo mu kongera ishoramari ryaba ishoramari ry’abikorera cyangwa gahunda za Leta zikorwa zigamije kongera ihangwa ry’umurimo ku rubyiruko ngo ubona ko zirimo gutanga umusaruro kandi hari ikizere ko zizakomeza kugenda zikora ndetse zigira icyo zigabanya ku bushomeri mu Rwanda.

Yashimiye APEFE n’abandi bafatanyabikorwa gufasha gushyira mu bikorwa iyi gahunda yo kwigira ku murimo abantu bakigira mu mashuri ariko ntibigarukire aho ahubwo bakuzuza ubumenyi bahawe ku mashuri binyuze mu kwigira ku murimo.

Umuyobozi wa Porogaramu ya APEFE Marie Pierre Ngoma ashimangira ko uru rubyiruko rwize neza ndetse bamwe muri bo ngo bamaze kubona akazi batararangiza neza gahunda kandi abakoresha bakaba barasubijwe kuko babonye abakozi bafite ubushobozi aho buzuzanya kuko baba bashaka  abakozi bafite ubumenyi ku rundi ruhande abakozi na bo bashaka abakoresha beza.

Avuga ko uru rubyiruko rwize neza ibyo isoko ry’umurimo rikeneye. Agasanga kubahuza  n’abakoresha na bo bakeneye abakozi beza kugira ngo bongere umusaruro w’ibyo bakora bunguke.

Abafite ibigo byikorera barimo Kavutse Michel afite uruganda  rutunganya umusaruro w’ibikomoka ku ifarini mu karere ka Kicukiro, akaba umwe mu bahagarariye  ishyirahamwe ry’abantu bakora imigati mu Rwanda ashimira urubyiruko rusoje ubumenyi ngiro  mu gice cya mbere muri gahunda ya igira ku murimo kuko rwagaragaje  ubwitange n’ubushake ahahamya ko uyu  munsi uwabaha akazi ntacyo yahomba.

Yagize ati: “Ibyo bize ntibibafitiye akamaro ubwabo gusa ahubwo natwe ndetse n’igihugu muri rusange.”

Urubyiruko rwanyuzwe na gahunda yo kwigira ku murimo

Bamurange ufite ubumuga bwo kutumva no kutavuga yize ubudozi atewe inkunga na APEFE avuga ko kuri ubu ashobora gukora ubudozi.

Mbere yuko ngo ajya kwiga yabanje kwiga amashuri yisumbuye nyuma abura ubushobozi bwo gukomereza muri kaminuza ababyeyi be nta bushobozi bari bafite bwo kumujyanayo.

Yagize ati: “Nagize amahirwe akomeye kuko APEFE yantoranyije mu biga imyuga. Ubu nifitiye ikizere cyo kuba twakomeza tukikorera tugakora ubudozi natwe tugatera imbere.”

Asaba abatera nkunga gukomeza gufasha abafite ubumuga bwo kutumva no kutavuga kugira ngo be gusigara inyuma mu iterambere.

Shyirambere Jean de la Paix atuye mu karere ka Musanze yize ibijyanye no gutegura ibyo kurya n’ibyo kunywa yishimira ko nyuma yo kubyiga yakoze ibizami akabitsinda akaba yishimiye uburyo APEFE ibitayeho ibahuza n’abatanga akazi kuko ari inzira nziza yatuma bava mu bushomeri.

Avuga ko nabona akazi afite igitekerezo cyo kuzizigamira nyuma akishingira company ye nawe akajya aha abandi akazi.

Urubyiruko 121 ni rwo rwasoje igice cya mbere cya gahunda ya Igira ku murimo.

Gahunda ya Igira ku murimo yemejwe na Guverinoma y’u Rwanda mu mwaka wa 2015 ishyirwa mu bikorwa na Minisiteri y’Abakozi ba Leta n’Umurimo n’urugaga rw’abikorera PSF ku bufatanye n’umuryango mpuzamahanga w’ababiligi APEFE.

Click to comment

Leave a Reply

Your email address will not be published. Required fields are marked *

IZASOMWE CYANE

To Top