Afurika

Mu Rwanda hatangijwe uburyo bw’ikoranabuhanga bwo gusangira amakuru ku buhinzi.

Ihuriro ry’abahinzi n’aborozi bo mu karere ka Afurika y’uburasirazuba “EAFF” batangije uburyo bw’ikoranabuhanga rya Telefoni ryiswe “e-Granar” rizafasha abahinzi bo muri aka karere gusangira amakuru y’ubuhinzi hagamijwe kuzamura inyungu bakura mubuhinzi bwabo.

Ubwo kuri uyu wa 28 Ugushyingo 2018 ,I Kigali hatangizwaga ubwo buryo ,umuyobozi w’urugaga rw’Abahinzi n’aborozi bo mu Rwanda “IMBARAGA” Munyakazi Jean Paul yatangaje ko ubu buryo buzibanda kukumenyanisha amakuru yerekeranye n’umusaruro w’ubuhinzi bw’ibinyampeke n’imisogwe bityo bikoroshya ubuhahirane cyane ko ngo hari igihe abahinzi bo mugihugu kimwe baburaga isoko ry’umusaruro wabo ,nyamara hari ikindi gihugu muri aka karere cyabuze umusaruro.

Ati “ ikibazo cyagaragaraga hari igihe wasanga dufite umusaruro mwiza kandi mwiza ariko ibindi bihugu ntibimenya umusaruro dufite ….icyo gihe rero twasanze igisubizo dukwiye gushaka ari uko twatangije urugaga rugamije ubucuruzi kandi rukozwe n’abahinzi ,tugashaka amasoko ariko tukanamenyesha n’abacuruzi ubwo umusaruro dufite”.

Munyakazi Jean Paul yavuze ko e-granar izafasha abahinzi kurushaho gufata neza umusaruro cyane ko kuri ubu ngo usanga hari umusaruro mwinshi utakara mu gihe cy’isarura.

Ati “ Twasanze 30% utakara mugihe cyo gusarura kandi ariwo wakatubereye inyungu,iyi e-Granar rero ije kudufasha kuduhuza n’abacuruzi bagura umusaruro ariko n’ikintu kijyanye no gufata umusaruro neza”.

Umuyobozi Ushinzwe Iterambere ry’Ubuhinzi muri Minisiteri y’ubuhinzi n’ubworozi , Dr.Charles Murekezi yavuze ko ubu buryo uzafasha amakoperative y’abahinzi muri aka karere binyuze muguhanahana amakuru ,no guhura n’abaguzi b’umusaruro wabo .

Ati “ Iyi Platform izaba ifite abahinzibari mu makoperative ,n’abaguzi bazaza muri iyo platform bakamenya ahari umusaruro ufite ubuziranenge ukenewe muri rubanda” .

Dr. Murekezi yavuze ko buri muguzi muri aka karere uzakoresha ubu buryo azajya amenya ahari umusaruro muri buri gihugu bityo akajya kwugura bitewe n’ikifuzo cye. Yongeyeho ko ubu buryo buzafasha abahinzi kujya bihitiramo uwo bashaka kugurisha nabo bitewe nuko hazaba hari abaguzi benshi bari muri ubu buryo”.

Umuryango w’Abahinzi n’aborozi mu karere ka Afurika y’uburasirazuba “Easter Africa Farmers Federation” washinzwe muri 2001 ugamije kuzamura ijwi ry’abahinzi n’aborozi bo mu karere no kubongerara ubushobozi.

Ukaba ugizwe n’Abahinzi –borozi bagera kuri Miliyoni 20 bo mu karere ka Afurika y’uburasirazuba n’iyo hagati ari nabo ahanini bazahita bungukira muri ubu buryo bwo gusangira amakuru hifashishijwe ikoranabuhanga “e-Granar”.

Umwezi.net

Click to comment

Leave a Reply

Your email address will not be published. Required fields are marked *

IZASOMWE CYANE

To Top