Afurika

U Rwanda,Uganda na Congo bararebera hamwe uburyo bwo kurushaho kubungabunga icyanya cya Virunga.

Abashinzwe kubungabunga ibidukikije baturutse mubihugu by’u Rwanda ,Uganda ,na Congo Kinshasa ,kuri uyu wa 26 Ugushyingo 2018 bahuriye mu nama y’umunsi umwe bigira hamwe uburyo ibi bihugu  byakorana bya hafi mu kubungabunga urusobe rw’ibinyabuzima biri mu cyanya cya Virunga ari nacyo kibarizwamo Parike y’ibirunga.

Iyi nama yari yatabiriwe n’uhagarariye ingabo za Loni ziri mubutumwa bw’Amahoro muri Congo “MONUSCO” ndetse n’abahagariye inzego za gisirikare zo mubihugu uko ari bitatu byavuzwe haruguru,abayitabiriye bose bagaragaje ko imitwe y’inyeshyamba ikorera mu mashyamba ya Congo ,ariyo igira uruhare runini mu kwangiza urusobe rw’ibinyabuzima bibarizwa mu cyanya cya Virunga.

Iyi mitwe y’inyeshyamba ngo ahanini yigabiza amashyamba igatema ibiti byo gutwika amakara aho byagaragajwe ko byibura buri cyumweru izo nyeshyamba zigurisha amakamyo 80 y’amakara.

Usibye gutwika amakara ,ngo iyo mitwe y’inyeshyamba yica inyamanswa nyinshi ishaka inyama zo kurya no kugurisha ibikomoka kurizo nk’amahembe y’inzovu,hakiyongeraho no gucukura amabuye y’agaciro muburyo budakurikije amategeko

Ibura ry’ibiribwa bihagije mu karere gaherereyemo icyanya cya Virunga ,nacyo cyagaragajwe nk’ikibazo kibangamira umutekano w’inyamanswa muri kariya gace kuko ngo abaturage bahaturiye bahita bayoboka inzira y’ubuhigi bashaka inyama zo kurya.

Kuba ibi bibazo byose atari ubwa mbere bigaragajwe ,abanyamakuru bifuje kumenya niba atari intege nke z’abashinzwe kubungabunga  ibidukikije muri aka karere,ariko Dr Andrew G. Seguya ,Umunyamabanga mukuru w’umuryango uhuza ibihugu bihuriye ku cyanya cya Virunga “GVTC” asubiza ko atari intege  nke kuko ngo hari byinshi byakozwe ,nubwo ngo bashaka kugira byinshi bakora kurushaho.

Ati “Murabizi ko umuryango mpuzamahanga wita kukurinda umutungo kamere “IUCN” wagaragaje ko Ingangi zo mu misozi zitakiri ku rutonde rw’inyamanswa zishobora kuzimira burundu,icyo ni icyerekana ingufu twashyizemo ,ariko turifuza kurenzaho”.

Dr Andrew yavuze ko icyo bazashyiramo ingufu ari ukwigisha abaturage akamaro ko kubungabunga ibidukikije ariko nanone bagasaba ibihugu gushyiraho gahunda zituma abaturage babona ibyo gukora bibateza imbere kugirango batishora mu kwangiza ibidukikije kubera ubukene.

Imitwe y’inyeshyamba yo izigishwa ite? 

Abanyamakuru babajije Dr Andrew uko bazajya kwigisha Imitwe y’inyeshyamba akamaro ko kubungabunga ibidukikije ,maze asubiza ko abajya muriyo mitwe n’ubundi baba baturutse mu baturage ,ko mugihe abaturage baba babyumvise byatuma n’iyo mitwe itongera kwangiza ibidukikije.

Abajijwe niba hatakwifashishwa imbunda mu kubuza imitwe y’inyeshyamba kwangiza ibidukikije,asubiza ko bo icyo bashyize imbere ari ugushyira imbaraga mu biganiro  .Ati “Twe uburyo dukoresha ni ibiganiro ,n’impamvu y’iyi nama si ugushaka ingufu za gisirikare… ,twe dukoresha kuganira ,tugashyira abantu kumeza y’ibiganiro “.

Mutangana Eugene ushinzwe kubungabunga ibidukikije mu kigo cy’iterambere RDB,yavuze ko nk’u Rwanda nta kibazo kinini  bafite kijyanye n’abangiza urusobe rw’ibinyabuzima mu cyanya cya Virunga ,ariko ko hari imitungo kamere rusangiye n’ibindi bihugu ari nayo mpamvu hakenewe ubufatanye mu kuyibungabunga.

Mutangana yatanze urugero rw’Ingangi zo mu muryango witwa Kwitonda uherutse kuva muri Kongo ukimukira mu Rwanda ,u Rwanda rukazifata neza kandi ko amafaranga  avuyemo hari amasezerano bagiranye na Congo y’uburyo bazajya bayagabana.

Umwezi.net

Click to comment

Leave a Reply

Your email address will not be published. Required fields are marked *

IZASOMWE CYANE

To Top