Amakuru

Nyagatare : Abagore barasabwa kutitesha agaciro biyandarika

Bamwe mu bagore bo mu karere ka Nyagatare mu murenge wa Matimba bavuga ko bahangayikishijwe n’ ubuzima babayeho mu ngo zabo bitewe n’ ubukene .Uretse kuba birirwa mu mirimo inyuranye y’ urugo ngo bafatwa nkaho ari imburamukoro kuko abagabo babo nta gaciro babaha ahubwo bakabashinja kwirirwa bazerera .

Umwe muri abo bagore utuye mu kagari ka Byimana avuga ko bigoye kunezeza umugabo igihe cyose. Agira ati “Hano iwacu udafite akantu ucuruza ngo winjize agafaranga mu rugo , ugerageza kuruhahira ntacyo uba uri cyo imbere y’ umgabo.” Kenshi ngo abagabo bakunze gukoresha amagambo y’ incyuro bashaka kubwira abagore babo ko ntacyo bamaze ngo kubera kutinjiza.

Mutumende Alphonsine, wo mu kagari ka Byimana ya mbere mu murenge wa Matimba avuga ko mu rwego rwo gushaka igisubizo kuri iki kibazo hari ubwo abagabo babo bagerageza kubaha igishoro ngo bacuruze ariko kandi ngo nabyo usanga ari ikigeragezo kuri bo

Agira ati”iyo umugabo aguhaye nk’ ibihumbi icumi (10,000 Frw) ngo ucuruze inyanya cyangwa izindi mboga uragerageza ugashakisha ariko kandi iyo uhombye ukora ibishoboka byose igishoro cy’ umugabo kikaboneka “Uyu mugore akomeza avuga ko nubwo umugabo aba yaguhaye igishoro kenshi bamwe muri bo ngo hari inshingano z’ urugo bahita bikuraho zigaharirwa umugore nko guhahira urugo, kwambika abana n’ibindi.Ibi ngo ni nabyo ahanini bibatera igihombo na bwa bucuruzi ntibugire icyo bumara mu kuzamura agaciro k’ umugore mu rugo dore ko ngo ubwo bahita batangira kwitwa injiji,abatagira gahunda , abanywanzoga n’andi mazina atesha agaciro ikiremwamuntu.

Gukorana n’ ibigo by’ imari ku bagore biragoye

Iyi nkuru dukesha urubuga nkoranyambaga paxpress.rw ivuga ko aba bagore bo muri Matimba bavuga ko nabyo bitoroshye kubera ko nabwo iyo nguzanyo iyo uyifashe uyigabana n’ umugabo.Kbatesi agira ati”hari umugore uherutse gufata amafaranga y’inguzanyo muri gahunda y’ ubudehe,ayabonye agurira umugabo we igare , asigaye ayashora mu bucururzi buciriritse aza guhomba none umugabo yaramutaye n’ igare yaririjyanye , ubu umugore niwe usigaye acunaguzwa no kwishyura iyo nguzanyo , ibintu bitamworoheye na gato kuko hejuru y’ ibyo umugabo yamutanye abana batandatu agomba kwitaho.
Aba bagore bavuga ko abagabo babo batabemerera gufata inguzanyo kandi ngo niyo abikwemereye ntiyakwemera ko yose uyashora kuko abanza gufata igice kimwe akagishyira mu mufuka we .

Abagore bakwiye gukorana n’ibigo by’imari

Nemerabahizi Alexandre avuga ko ibyo abagore bavuga ari ugushaka guharabika abagabo akavuga ko benshi mu bagore bo muri Nyagatare ari abanyamurengwe. Bamwe mu bagabo bo muri Matimba bavuga ko kwishyira hejuru kwa bamwe mu bagore ari cyo gituma hakomeza kuzamo amakimbirane mu miryango.
Umuyobozi wungiririje w’ akarere ka Nyagatare ushinzwe imiereho myiza y’ abaturage  Domitilla Musabyemariya, avuga ko nubwo ibi bibazo biriho , abagore nabo bakwiye guhaguruka bakamenya uburenganzira bwabo gusa na none bakirinda kubutesha agaciro biyandarika.

Kagaba Emmanuel,umwezi.net

 

Click to comment

Leave a Reply

Your email address will not be published. Required fields are marked *

IZASOMWE CYANE

To Top