Amakuru

Rubavu: Barasaba kwigishwa gukoresha ikoranabuhanga

Mu gihe bigaragara ko ikorabuhanga riri gutera imbere cyane mu Rwanda, bamwe mu baturage b’Akarere ka Rubavu, bafite ibibazo mu kurikoresha, bakaba batewe impungenge n’uko ryabasiga inyuma.

Akarere ka Rubavu,  kavuga ko  karajwe inshinga no gushaka uburyo ritabasiga kandi ari bo bagenerwabikorwa ba mbere.

map rubavu

Kubitsa no kubikuza amafaranga muri banki hakoreshejwe telefoni zigendanwa cyangwa amakarita yabugenewe yitwa “visa card”, kubona ibyangombwa bitandukanye muri Leta hifashishijwe telefoni cyangwa murandasi, kumenyekanisha imisoro no kuyishyura binyuze kuri murandasi,ibyo ni bimwe mu bigaragaza ko ubuzima bw’abaturage b’Akarere ka Rubavu bugenda bugengwa n’ikoranabuhanga

 Kalima Aloys, ni umuturage utuye mu gasanteri ka Mahoko, Umurenge wa Kanama.

 Agira ati, “Turasabwa gukora buri kintu hifashishijwe murandasi cyangwa telefoni zigendanwa, nyamara benshi muri twe ntituzi iyo biva n’iyo bigana!”Akomeza agaragaza ko asanga iterambere ry’ikoranabuhanga rifitiye akamaro abantu bake bazi kurikoresha. Ati “Niba ntagikozwe ngo umuturage yigishwe kurikoresha,tuzashiduka benshi basigaye!”.

 Izi mpungenge akaba azisangiye na bamwe mu baturage bari kumwe na we mu kumba gato, aho bafashwaga kubona ibyangombwa by’amavuko no guhererekanya ubutaka binyuze kuri murandasi, aho muri Mahoko.

Aba baturagebavuga  ko  habayeho kwihuta cyane mu gukuraho kubona ibyangombwa mu buryo bwari busanzwe. Bagira bati, “Byari byiza kubanza kutwigisha uko bikorwa ndetse no kugeza ibikorwaremezo ahantu henshi!”

 Umunyamabanga Nshingwabikorwa w’akagali ka Gikombe, Umurenge wa Nyakiliba,Ngabo Janvier, avuga ko  abantu bamwe bazi ko telefoni ari izo gukoresha bitaba cyangwa bahamagara gusa.

Ati “Biragoye gusaba umuntu gukora imenyekanisha ry’imisoro hakoreshejwe telefoni mu gihe ayimaranye imyaka irenga itatu atazi no kohereza ubutumwa bugufi!” Kuri we, ngo

Akomeza avuga ko  bikwiye ko abaturage bahugurwa ku bijyanye n’imikoresherezwe ya telefoni mu ikoranabuhanga. Ati “Niba bitabaye ibyo, benshi bazasigara inyuma da!”

 Ku rundi ruhande, zimwe muri banki zo mu karere ka Rubavu, zivuga ko nubwo abaturage bashyiriweho uburyo bwo kubona serivisi hifashishijwe ikorabauhanga, abazikoresha usanga bakiri bake.

Umwe mu bakozi ba banki utarashatse ko izina rye ritangazwa,ati, “Byageze aho banki ifata ingamba zo gukata amafaranga umuntu ufite visa card wese uje kubikuza atayikoresheje.”

 Ibi ngo byakozwe mu rwego rwo gushishikariza abakiliya babo kwimenyereza gukoresha ikorabuhanga.

Nyamara, Karangwa Jules, umukiliya wa banki ya Kigali, agaragaza impungenge zikwiye kwitabwaho. Ahagaze imbere y’icyuma gitanga amafaranga(ATM), kuri banki ya Kigali, ishami rya Rubavu, ati “Dore bashyizeho ibi byuma, ariko se abakiriya bazi kubikoresha ni bangahe?” Avuga ko benshi bifashisha abashinzwe umutekano kugira ngo babafashe kubikuza, ibintu asanga bigabanya icyizere ku mutekano wa konti zabo. Ati “niba se ubwiye “umusekirite” ijambo ry’ibanga rya konti yawe, uzaba ukizeye ute ko amafaranga yawe ari mu mutekano?”. Kuri we, ngo banki zikwiye gushyiraho umukozi uhoraho ufasha kandi akigisha abakiriya gukoresha ibyuma bitanga amafaranga.

Murenzi Janvier, Umuyobozi w’akarere wungirije, ushinzwe imari n’iterambere ry’ubukungu, avuga ko bamaze kubona ikibazo kandi ko hari ingamba ziri gushyirwa mu bikorwa kugira ngo bazibe icyuho kiri hagati y’iterambere ry’ikoranabuhanga n’ubuke bw’umubare w’abarikoresha.

 Ati “ ubu turakoresha abanyeshuri bari mu biruhuko mu guhugura abaturage mu ikorabuhanga. Muri buri murengewo mu karere ka Rubavu hari ahantu hagenewe aya mahugurwa.”

Kuri Murenzi, ngo gukoresha urubyiruko ni bwo buryo bwa mbere bushoboka mu kwigisha abaturage benshi kugendana n’ikoranabuhanga. Akaba avuga ko ari muri uru rwego, ku bufatanye na Minisiteri y’urubyiruko n’ikoranabuhanga (MYICT), binyuze mu mushinga Korea Telecoms Rwanda Network (KTRN), bashyizeho “santere” ikomeye cyane mu mujyi wa Gisenyi yigisha nibura abantu mirongo itandatu ku munsi biganjemo cyane urubyiruko rutegurirwa kwigisha abaturage. Ati “turizera ko aya mahugurwa azatuma tuziba icyuho kigaragara hagati y’iterambere ry’ikorabuhanga n’umubare w’abarikoresha.”

Rubavu

Urubuga nkoranyambaga paxpress dukesha iyi nkuru, rukomeza ruvuga ko byongeye kandi, Murenzi avuga ko kuba amwe mu mabanki, ibigo by’itumanaho nka MTN, TIGO na AIRTEL, ikigo gishinzwe imisoro n’amahoro (Rwanda Revenue Authority) n’ibindi bigo batangiye gukora ubukangurambaga, na byo bizakemura ikibazo. Ati, “barimo kwigisha abo bakorana ndetse n’abakiliya babo gukoresha ikoranabuhanga mu kubona serivisi zitangwa n’ibyo bigo.” Cyakora akaba abasaba ko babishyiramo imbaraga kugira ngo bigere kuri benshi kandi vuba. Asaba kandi abaturage na bo kugaragaza ubushake bwo kumenya, bagakurikira amakuru bakamenya aho igihugu kigeze.

Ku ruhande rw’umukozi ushinzwe ikoranabuhanga mu karere ka Rubavu, Gasagure Joël, ngo hakwiye kubaho ubukangurambaga bwimbitse, kuko hari n’abataramenya ko igihugu gikataje mu ikorabuhanga. Ati “Hari n’abatazi ko nko muri Rubavu dufite ‘fibure obutike’ (fibre optique . Bakwiye kwigishwa bakajyana n’igihe naho ubundi igihugu kirabasiga”

Umwezi.net

 

Click to comment

Leave a Reply

Your email address will not be published. Required fields are marked *

IZASOMWE CYANE

To Top