Amakuru

Bugesera : Abagore nabo ntibatanzwe mu gukora imirimo ya tekinike

Mu gihe hamenyerewe ko abagabo ari bo bakora imirimo ya tekinike, mu Murenge wa Nyamata, Akarere ka bugesera,   iyo mirimo ikorwa n’abagore ndetse batari n’abakiri bato mu myaka, ahubwo ni abakecuru bane bafite imyaka kuva kuri 51 kugeza 56. Si ibyo gusa kuko utangara cyane iyo bakubariye inkuru y’uko bagiye kwiga mu gihugu cy’Ubuhinde (India), nyamara nta rundi rurimi bazi keretse Ikinyarwanda kandi bakaba barize amashuri atandatu abanza gusa.

map bugesera

Nyiramubandwa Cecile afite imyaka 53 akaba ayobora iryo tsinda ry’abakecuru bane bamaze imyaka itanu bakora umurimo wo gukwirakwiza ingufu z’amashanyarazi zikomoka ku zuba. Nyiramubandwa avuga ko nta pfunwe baterwa no gukora umurimo wari umenyerewe nk’uw’abagabo, ngo kuko ihame ry’uburinganire n’ubwuzuzanye mu muryango ryabacengeye kandi bakajijuka bakamenya ko n’umugore akwiye guhaguruka agakora, agateza imbere umuryango we afatanyije n’umugabo igihe amufite. Agira ati “Njyewe narapfakaye ariko nashoboye kurera abana banjye bane kuko namenye neza ko nta murimo w’abagabo gusa ubaho, ahubwo nanjye mbasha gukora byose kandi byangiriye umumaro. Twashyize aya mashanyarazi mu nzu 110 mu mwaka wa 2012 kandi nta mugabo wadufashije kurira inzu ngo tumanike biriya bikoresho, ni twebwe twabikoze kandi n’ubu ikigize ikibazo nitwe tugisana.”

Nyirarumongi Odette afite imyaka 56, avuga ko kwambara ipantalo akarenzaho igishura akurira inzu nta kimwaro biteye, ko ahubwo ari ishema kuri we ngo kuko ntako bias kugira umwuga kandi umwinjiriza inyungu.Yagize ati “Mfite abana batatu biga muri kaminuza ariko mbasha kubabonera amafaranga yo kugura ibikoresho by’ishuri kuko ay’ishuri yo leta irayabatangira. Dufite konti muri banki y’itsinda tuzigamiraho ku buryo ugize ikibazo aguza akagikemura. Nanjye mperutse kuguzamo amafaranga ibihumbi mirongo itanu (50000) nkemura utubazo tw’abana bari ku ishuri. Umugabo wanjye nawe nta kibazo bimutera kuba nkora aka kazi.”

Bugesera

Aba bakecuru bakora imirimo ya tekinike

 Uwimana Claudine w’imyaka 53 akaba afite abana batanu, avuga ko kwigisha umwuga byamufunguye mu mutwe, akatinyuka akabasha gukorera umuryango we biruseho no kuwuteza imbere.

Ati “Si ugukora amashanyarazi gusa twize, ahubwo tuzi gukora amabuji n’ingwa zo kwandikisha ku buryo tubonye ibikoresho bihagije twajya tubikora tukagurisha. Mu mezi atatu ashize twakoze ingwa nkeya tuziha abanyeshuri bazitwara ku ishuri ndetse na buji tuziha abaturanyi.”

Mukantabana Dative ni we muto mu itsinda akaba afite imyaka 51, avuga ko umurimo bakora watumye ashobora kubona amafaranga yo kuvugura inzu y’umuryango we ndetse akagura n’ibikoresho byo mu nzu.

Agira ati “Tugitangira kumanika biriya bikoresho hejuru ya mazu, abantu ntibizeraga ko twashobora kubacanira ariko babonye amatara yatse bemera ko dufite ubumenyi kandi n’ubu baratwitabaza iyo habaye ikibazo cya tekinike tukabasanira. Mu ntangiriro twakuyemo amafaranga arenga miliyoni kuko buri muryango wabwaga wishyuraga ibihumbi cumi na kimwe (11000) ariko ubu uwo dusaniye yishyura ibihumbi bibiri gusa.”

 Urubuga nkoranyambaga paxpress dukesha iyi nkuru, ruvuga ko aba bakecuru bahuriza ku kibazo cyo kubura akazi gahagije ngo babyaze umusaruro ubumenyi bafite, bakavuga ko ubusanzwe bakora akazi k’ubuhinzi nyamara bafite ubumenyi bwabyara inyungu nyinshi )iruta iy’ubuhinzi) baramutse babonye akazi gahagije ko gukwirakwiza amashanyarazi akomoka mu ngufu z’izuba.

Goverinoma y’u Rwanda ifite intego yo kongera umubare w’Abanyarwanda bakoresha amashanyarazi akomoka ku ngufu z’izuba bakagera nibura kuri 13 ku ijana (13%) muri uyu mwaka w’ingengo y’imari, bavuye kuri batatu ku ijana (3%) mu mwaka ushize. Muri rusange, biteganyijwe ko abakoresha amashanyarazi bazagera kuri 41 ku ijana (41%) bavuye kuri 27 ku ijana (27%).

Kagaba Emmanuel, umwezi.net

Click to comment

Leave a Reply

Your email address will not be published. Required fields are marked *

IZASOMWE CYANE

To Top